✒ د. بولا وجيه
بعد جلسات ومكالمات كتير بيني وبينه بخصوص مشاكل كان بيحكيلي عنها باستمرار سألته: "أنت بعدت عن مصدر الأذى أصلاً؟"
بص لي باستغراب وهو بيقول: "مقدرش أبعد.."، وكأن البعد صعب أو مستحيل من وجهة نظره علشان ميتقالش عليه شخص معندهوش أصل أو محبة.
لكن الحقيقة اللي هو كان غافل عنها أنه طول ما هو في المكان الغلط عمره ما هيقدر يعيش حياته بالشكل الصح.
بداية رحلة التعافي من إدمان المخدرات بتبدأ بأننا بنحاول نبعد المدمن عن المخدر علشان يقدر يتعافى.
الشخص اللي بيعاني من السمنة المفرطة مبيقدرش يخس غير لو اتحكم في نفسه وقدر يبعد عن الأكل فترة.
نفس النظام بشوفه بينطبق على حياتنا النفسية، عمرك ما تقدر تعيش مرتاح نفسياً أو مبسوط، طول ما أنت في المكان الغلط.
طول ما أنت مع أشخاص مش مدينلك الأمان النفسي اللي محتاجه في حياتك فعلاً، أو بمعنى أدق بيزودوا ضغوطك النفسية.
جرب تبعد قبل ما تشتكي من الأذى، جايز وقتها متحسش بالأذى، أو جايز وقتها ترتاح في حياتك.