❞الخنجر يجرح القلب، ولكن الكلمة تقتل الروح!❝
تخيل كام مرة كلمة اتقالت بصورة هزار أو صورة
أنه "عادي"، لكن الحقيقة دخلت جوا قلبك عصرته!، وخليتك تفكر وتعيد
حساباتك أكتر من مرة في أن الشخص اللي قدامك ده بيحبك فعلاً ولا لا؟!.
•••
الجمل البسيطة أو الكلمات القليلة ممكن
مبتاخدش وقت في أن الإنسان يقولها، لكنها بتاخد أوقات كتيرة أوي على بال الإنسان
ما يقدر "يتناسى" أو يحاول يتجاوزها بقدر المستطاع..
مع أن أحياناً يمكن في كلمة حلوة، أو فعل رغم
بساطته، تقدر تتملك قلب اللي قدامك، لكن بالمحبة مش بالإكراه أو بالعافية، لأن
القلوب بتميل دايماً للشخص اللين، الحنين، اللي فعلاً بيكون طبطبة تهون عليه أي
مشاكل بيشوفها في حياته.
•••
صدقني، الكلمة الحلوة جايز متكلفكش مجهود
كبير أو شاق لو في قلبك محبة صادقة وحقيقية، لأن ساعتها هتكون بتخلي قلبك بيتنفس،
وبيعبر عن المشاعر الحلوة اللي جواه وموجود.
لكن صدقني، الكلمات السلبية لو كانت سهلة على
لسانك وسهلة تخرج منه، فهي مش سهلة على قلب اللي بيسمعها، ولا على روحه، وخصوصاً
لو أصلأً هو من الأساس عنده إحتياج للحب وبيدور عليه.
•••
قدم الحب، لأنك محتاج تحب، زي ما بتكون محتاج
تتحب، وقدم الحب، زي ما ربنا حبك، مش زي ما أنت منتظر أن الناس تحبك، حب غير
مشروط، غير مقرون بشروط معينة وتفاصيل معينة، حب سليم ومليان فطرة خالية من
العيوب!
✒️د.بولا وجيه